Nakaupod ang tech tycoon kag ginakabig nga pinaka-manggaranon nga tawo sa bug-os nga kalibutan subong nga si Elon Musk sa nangin paghinun –anon nanday US President-elect Donald Trump kag Ukraine President Volodymyr Zelensky sa phone call isa ka adlaw matapos ang 2024 US Presidential elections.
Ginkumpirma sang isa ka Ukrainian official nga may direkta nga nahibaluan sa pag-istoryahanay sang 2 ka lider nga nagtawag si Zelensky kay Trump para tamyawon sa iya pagkadaog sa US elections kag nagkalugar naman nga kaupod sadto ni Trump si Elon Musk sa Mar-a-Lago.
Ginlaragway naman sang isa pa ka source ang nangin pag-istoryahanay nanday Trump kag Zelensky bilang positibo kag cordial conversation.
Suno pa nga ginbutang ni Trump ang tawag sa loud speaker kag ginhatag kay Musk ang phone.
Ginpasalamatan naman ni Zelensky si Elon Musk para sa iya pagbulig sa ila pungsod nga mag-angkon sang mga komunikasyon pinaagi sang access sa Starlink satellite internet platform sa tunga sang masubra 2 ka tuig nga giyera sini sa Russia.
Nagdugay ang ila pag-istoryahanay sa 7 ka minute apang wala sang gintalakay nga mga polisiya.
Ang presensiya suno ni Musk sa nasambit nga phone call sa tunga nanday Trump kag Zelensky ang nagapakita sang iya nga impluwensiya sa circle ni Trump.
Matandaan nga ginsuportahan ni Musk ang kampaniya ni Trump sa katatapos nga US elections kun sa diin naggastos ini sang yara sa $130 million.
