ROXAS CITY – Ginapreparar na sang National Housing Authority (NHA) kag Local Government Unit (LGU) ang lugar nga mahimo temporary shelter para sa apektado sang sitwasyon sang pagkatiphag sang duta sa banwa sang Panitan.
Ini ang ginpahayag ni Punong Barangay Freddie Dela Rosa sang Poblacion Tabuc Norte sang mainterview sang Bombo Radyo.
Suno diri, wala pa gintugutan ang pagpauli sang mga pumuluyo sa ila tagsa ka mga panimalay bangud sa padayon nga paglala sang pagkatiphag sang duta tuga sang mamunog nga pag-ulan.
Ginasiguro naman ni Dela Rosa nga padayon ang pag-abot sang relief goods sa 14 ka mga pamilya nga nag-evacuate.
Ginpahayag man ni kapitan nga ginaproseso na ang pagsaylo sang 14 ka mga pamilya sa Housing nga nahamtang sa Timpas, Panitan kun sa din magaserbe ini nga temporaryo nga puluy-an sang apektado tubtob masolbar ang ginapangatubang nga problema.
Maluwas sa temporary shelter magahatag man ang Department of Social Welfare and Development (DSWD) sang livelihood program agud makabulig sa apektado nga pamilya.
Dugang pa sini nga ginpadulungan naman sang DPWH-National ang lugar kag nagahulat na lang sang rekomendasyon sa mangin aksyon sa natabo.
