Nagkasugot na ang mga lider sang Thailand kag Cambodia sa gilayon nga pag-untat sang lupok sang Lunes, pagkatapos sang lima ka adlaw sang pinakamaduguon nga inaway sa tunga sang duha ka pungsod sa sulod sang masobra isa ka dekada.
Ang nasambit nga kasugtanan ang nagluntad matapos ang isa ka sinapol sa Malaysia nga ginpangunahan ni Prime Minister Anwar Ibrahim, ang karon nga ASEAN Chair, sa diin nagpasalig ang magtimbang nga bahin nga untaton ang inaway kag ibalik ang direkta nga komunikasyon.
Madumduman nga nag-umpisa ang inaway sang nagligad nga semana bangud sa madugay na nga border dispute sang duha ka pungsod nga nagresulta sa heavy artillery strikes kag Thai air strikes sa ila 817-km border.
Una, nagtanyag sang bulig ang China kag Estados Unidos sa negosasyon kun sa diin gintawag ni US President Donald Trump ang duha ka mga lider sini nga weekend agud engganyuhon ang kalinungan, kag nagpaandam nga wala sang trade agreement nga mapirmahan tubtob matapos ang inaway.
Suno kay Cambodian Prime Minister Hun Manet, nalipay sila sa nangin resulta sang pag-istoryahanay kag nagpasalig nga magabalik sa normal ang bilateral relations sa Thailand.
Ang acting Thai Prime Minister Phumtham Wechayachai nagsiling nga bisan pa nga una nga may mga pangduhaduha siya sa sinseridad sang Cambodia, nagsiling siya nga ang Thailand handa sa pagpatuman sang untat-lupok “in good faith.”
