Nangin atraksyon ang pagselbrar sang 34th Tigkaralag Festival sa banwa sang Pavia, Iloilo Province.
Sa interview sang Bombo Radyo kay Sangguniang Kabataan Chairperson Paul Castor Janobas sang Barangay Balabag,Pavia, iya ginpakigbahin ang mga hitabo sa pagselebrar sang nasambit nga festival.
Suno kay Janobas, ang tigkaralag festival ang isa ka kahiwatan agud nga handurawon kag tagaan sang respeto ang mga nagtaliwan kadungan sang palaabuton nga tigkalalag sa Nobyembre 1 kag 2.
Ini ang ginhiwat sang tatlo ka adlaw kun sa diin sang Oktubre 28 nagpatigayon sang children’s costume party, sang Oktubre 29 naman ginhiwat ang pagrampa sang nagkalain-lain nga mga indibidwal suksok ang mga recyclable, materials kag kagapon, Oktubre 30, ginpatigayon ang dance drama showdown nga ginpasakupan sang mga barangay sa banwa sang Pavia.
Pahayag pa niya, may 18 tanan ka mga participants ang nagpakigbahin sa sini nga kompetisyon kag ang Barangay Binalabag ang ginkilala nga winner kag naka-angkon man sang nagkalain-lain nga major kag minor awards.
Dugang pa sang natungdan, ang tigkaralag festival ang indi panghadluk sa mga tawo kundi pagpakita lamang sang sari-sari nga kultura sang banwa sang Pavia.
Interviewed by: Bombo Francis Biñas via Bombohanay sa Udto
