Gindepensahan lamang ang iya kaugalingon kag pamilya sang tiyo nga naglabo-patay sa iya kaugalingon nga hinablos sa Barangay Agmalobo, Ivisan, Capiz.
Matandaan nga ginkilala ang biktima kay Clin Cordero Ocante, 39-anyos kag residente sang Dumangas, Iloilo, samtang ang ginatudlo naman nga suspek amo si Jimmy Ursos Ocante, 49-anyos kag residente sang nasambit nga lugar.
Sa interview sang Bombo Radyo kay alyas “Emilda”, asawa sang suspek, ginpahayag sini nga wala sang kamatuoran nga nagpalagyo ang iya bana kag personal ini nga nagsungka sa kapitan sa amo nga barangay.
Antes suno diri nga nagluntad ang krimen, masadya nga nagainom-inom ang suspek kag ang utod sang suspek sa ila kusina, tubtob nga nag-abot ang biktima sa puluy-an sang amo nga suspek nga yara na sa impluwensya sang makahulubog nga ilimnon bangud may binayle sa ila barangay.
Dugang pa sini, madamo na sang kaso nga pagpatay ang biktima sa Dumangas, Iloilo apang nakahilway man ini sa presohan.
Dugang pa nga panaysayon ni Emilda, sang nagsaka ang biktima sa balay sang iya tiyo gin-warningan na ni Jimmy ang iya asawa nga taguon ang tanan nga mga hinangiban sa ila puluy-an.
Sa tunga sang ila pag-inom-inom, ginapahayag nga ginhangkat sang biktima ang suspek sang away kag ginpahog pa ini nga pamatyon ang tanan nga yara sa sulod sang puluy-an kun indi ini magsunod.
Suno pa kay Emilda, lahog-lahog lang ang ginhimo sang iya gumangkon apang nangin seryoso ini bangud gintinindakan kag ginluok na sini ang iya bana kag indi na kaginhawa kag nagpin-ot ang dughan tungod may balatian pa ini nga highblood.
Ginlampusan sang bote ni Jimmy ang biktima tubtob nga ini ang nalipong kag nagkuha man ini sang binangon nga ginapahayag bag-o lang baid sa ila kwarto kag didto nga ginlabo sang suspek ang iya hinablos.
Tungod sa tuman nga kaingit, wala pa nakuntento ang suspek, ginguyod pa sini paguwa sang ila puluy-an ang biktima kag didto pa ginhatok-hatok labo tubtob sa ginbawian ini sang hulam nga kabuhi.
Nakapalagyo naman paguwa sa ila puluy-an si Emilda kaupod ang iya umagad kag ang lapsag sini bangud sa tuman nga nabatyagan nga kahadlok.
Samtang, nagapati naman ini nga gindepensahan lamang sang iya bana ang iya kaugalingon kag pamilya.
Sa karon, yara na ang bangkay sang biktima sa isa ka punerarya sa nasambit nga banwa kag natalana nga ipadalom sa autopsy examination, samtang nagapabilin naman sa kustodiya sang Ivisan MPS ang suspek para sa nagakaigo nga disposisyon.
