ROXAS CITY – Ginahulat sa karon sang pamunuan sang Traffic Management Unit (TMU) ang pag-aprubar sa ginaplano nga pag-amyenda sang Sangguniang Panlungsod sa pagdugang sa ordinansa sang siyudad sang hugot nga pagpatuman sang pagsuksok sang face shield, magluwas pa sa face mask kun nagasakay sa mga pampubliko nga salakyan.
Ini ang ginpahayag ni TMU-Head Gonzalo Andrada sang mainterview sang Bombo Radyo.
Ginpahayag ni Andrada nga nakahanda ang ila hanay sa pagbulig sa gobyerno sang siyudad ilabi na sa pagpangdakop sa mga magalapas sa amo nga pagsulundan.
Samtang ginahulat pa nila suno diri ang pag-aprubar sang konseho sang siyudad sang iga-amyenda sa existing ordinansa sa karon, ila ginaganyat ang tanan nga mga drivers sang public utility vehicles ilabi na sa mga tricycle drivers nga magsuksok gid sang face shield magluwas sa face mask kag mangin strikto man sa ila mga pasahero.
Pananglitan nga ang pasahero ang madakpan nga nagalapas sa pagsulundana, ang driver sa gihapon ang magapanabat sa mga otoridad.
Mahibaluan nga sa karon nga ordinansa sang siyudad, ang sinuman nga magalapas sa pagsulundan natuhoy sa pagsuksok sang face mask ang pagapapanaugan sang penalidad kun sa diin paga-warningan lamang ang violator sa 1st offense; P3, 000 para sa 2nd offense; kag P5, 000 para sa 3rd offense.
Mahibaluan nga ginamandu sang Department of Transportation (DOTr) ang hugot nga pag-obligar sa publiko sang pagsuksok sang face shield kag face mask sa pagsakay sa mga pampubliko nga transportasyon.
