ROXAS CITY, CAPIZ- Nagpanugyan, ang pamunuan sang Traffic Management Unit-Roxas City sa mga motorista nga naka-‘open muffler’ ang tagsa ka tambutso sang ila sini nga motorsiklo nga nagadalagan sa karsadahon sang syudad sang Roxas ilabi na sa oras sang kagab-ihon.
Sa interview sang Bombo Radyo kay Mr. Gonzalo Andrada, Head sang Traffic Management Unit-Roxas City, matigdas sini nga ginmitlang ang mga tinaga nga “Common sense na lang man tani kon bal-an man nga nagatuga sang tuman ka gahod ang tambutso sang ila motorsiklo.”
Dugang pa sini, may yara suno sila sang ginsunod nga pagsulundan sa diin amo ang City Ordinance No. 042-2002 ukon ang ‘Traffic Code of Roxas City’ kun sa diin nakabutang sa isa ka probisyon ang “Driving of motor vehicle with an open muffler or making unnecessary noise” sa diin nga amo ang nagadumili sa mga naggamit sang amo nga butang sa ila nga mga behikulo kag may natalana nga mga penalidad para diri.
Sa pihak nga bahin, may yara dapat suno diri sang ginagamit nga decibel meter nga amo ang magasukat sang gahod nagikan sa tambutso sang motorsiklo, kon sa diin 99 decibel ang ginapahanugutan. Apang, aminado si Andrada nga sa karon wala pa sang ginagamit nga decibel meter ang katapo sang City Ordinances and Regulations Enforcement (CORE) Unit kag Traffic Management Unit apang may ginabasehan sila nga ordinansa agud sarang nga makadakop sang mga nagabayolar.
Pahayag pa ni Andarad, madamo na sang mga reklamo ang nakalab-ot sa ila talatapan bangud sang gahod tuga sang mga naka-‘open muffler’ nga motorsiklo. Ginpahayag man sini nga amyendaran ini ni Roxas City Mayor Ronnie Dadivas ang nasambit nga ordinansa agudto maplastar sang maayo ang mga penalidad.
With a report from Bombo Sunnie Mae Batencila