ROXAS CITY – “What works for me,may not work for others”
Nagapati ang Top 9 sang February 2022 Social Worker Licensure Examination nga may yara sang gintalana nga oras para sa kadalag-an sang tagsa-tagsa nga indibidwal.
Ini ang ginpakigbahin nga pila ka tips ni Mrs. Lenery Buenafe Ponsaran, nag-gradwar sa Capiz State University (CAPSU) – Pilar kag Top 9 sa February 2022 Social Worker Licensure Examination, sang mainterview sang Bombo Radyo.
Suno diri, wala sini gin-ekspektar nga makapasar, mas ilabi nga nangin top 9, bangud aminado si Ponsaran nga tuman ka budlay sang amu nga licensure examination.
Sa pagkamatuod, ginkatingala sini kun paano niya nasal-ot sa iya masako nga skedyul ang pagtuon para sa amu nga eksaminasyon, dugang pa sang iya obligasyon sa iya bana kag duha ka mga kabataan, partida nga isa pa ka online seller.
Apang, bangud sa iya pangamuyo kag determinasyon, nagbunga ini sang sobra pa sa iya ginpangayo.
Matandaan nga nakakuha sang 82.20% nga rating si Ponsaran kag napuwesto sa ika-siyam sa amu nga pasinawan.
Pasado man ang apat pa sini ka kaupdanan nga sanday Jhilline Albaladejo, Mira Conanan, Norberto Flores Jr kag Ma. Bella Galea sang Capsu-Pilar.
