ROXAS CITY – Padayon nga ginabulong sa ospital ang isa ka traffic enforcer matapos ang nagluntad nga aksidente sa national highway sa Brgy. Rizal banwa sang Pontevedra.
Ginkilala ang enforcer kay Jonel Abolucion, 57-anyos residente sang Brgy. Sulu samtang ginkilala naman ang napilasan kay Laudence Aguilar, 22-anyos residente sang Sitio Abucayan, Brgy. Rizal sang nasambit nga banwa.
Sandig sa imbestigasyon sang Pontevedra Municipal Police Station, samtang ginasubay sang duwa ka motorista ang dalan sa Brgy. Rizal aksidente nga nabungguan ni Abolucion ang ginasundan sini nga motorsiklo nga ginamaneho ni Aguilar.
Bangud sa natabo, nag-angkon sang minor nga kapilasan si Aguilar samtang nadulaan sang alinto si Abolucion matapos naglampus ang ulo sa karsada nga gilayon man ginrespondihan sang BFP-Pontevedra kag ginpadangat sa ospital.
Sa karun, yara sa kustodiya sang Pontevedra MPS ang duwa ka motorsiklo nga imbolbado sa nasambit nga aksidente.
