Ginpanginwala sang traffic personnel nga siya wala siya nagbuya sang malain nga tinaga angut sa reklamo sang isa ka tricycle driver nga iya gindakop sang damlag lang sa Burgos St. Roxas City.
Sa interview sang Bombo Radyo kay Mr. Osmenia Aguirre,Traffic Personnel sang TMU-Roxas City, ginpahayag nga matapos nila na-monitor sa post sang Bombo Radyo nga nagareklamo ang amo nga trisikol driver.
Ginpahayag sini sang talatapan sang TMU nga sabton ang amu nga alegasyon para sa ka athagan sang tanan, bangud sini hugot naman nga ginpanginwala nga naka bungat ini sang malain nga tinaga sa amu nga tricycle driver.
Suno sa iya, na intindihan niya ang iya katungdanan kag indi niya mahimo ang mangmulay bangud nakasuksuk siya sang iya uniporme.
Dugang pa sini, importante nga mismo ang complainant ang magkadto sa ila opisina, kag ipalab-ot ang ila reklamo agud gilayon nga maaksiyunan.
Matandaan nga ang isa ka tricycle driver nagpadulong sa istasyon sang Bombo Radyo, matapos nga ginaalegar gindakop sang katapo sang Traffic Management Unit Roxas City nga indi sang insakto nga pagkumpiskar sa iya trycycle kag pagbuya sang malain nga tinaga.
Samtang, mensahe naman ni Aguirre sa mga trisikol driver nga kun may ara sang kasubong sini nga insidente, magpadulong kag mag-report sa talatapan sang Traffic Management Unit agud gilayon nga maaksyunan kag mahatagan sang kaathagan angut sa anuman nga sahi sang reklamo.
