ROXAS CITY – Aminado ang Pinagkaisang Tsuper at Operator Nationwide (PISTON) Capiz nga indi nila masarangan ang isa ka semana nga pag-untat biyahe sang mga jeepneys, nga pagabuhaton sang transport group nga manubela.
Sa interview sang Bombo Radyo kay Mr. Joebert Carandang, presidente sang PISTON-Capiz, ginsiling sini nga masiyado ka lawig ang isa ka semana kag makaapekto ini sa palangabuhianan sang mga driver kag operators diri sa Capiz.
Kun magapasakop gid man sila bilang suporta sa kaangay transport group, posible nga tubtob duha gid lamang ka adlaw ang ila masarangan.
Samtang, ginklaro ni Carandang nga indi sila sang kontra batuk sa Public Utility Vehicle (PUV) modernization program sang Land Transportation Franchising and Regulatory Board (LTFRB) kundi indi sila pabor sa mga rekisitos kag pagsulondan.
Suno pa diri, mas maayo nalang nga ibakal sang mga operators ukon drivers sang harvester para sa pagpanguma ang kantidad nga P2.4 million ikumparar sa pagbakal sang modernized jeepneys.
