Nagdangop sa ombudsman ang isa ka tricycle driver/operator agud ireklamo ang alkalde sang syudad nga si Mayor Ronnie Dadivas kag ang Tricycle Franchising and Regulatory Unit (TFRU) Head, Edgar Andrade.
Sa ekslusibo nga interview sang Bombo Radyo kay Mr. Niel Arapan, gintuad sini ang mga rason kun ngaa ginpalab-ot pa sa ombudsman ang iya nga reklamo.
Suno sa iya, nagproseso ini sang renewal sang iya nga Tricycle Franchise kag Mayor’s Permit, gincomply man niya ang tanan nga mga kinahanglanon sa pagrenew nagbayad sa tanan nga mga balayran.
Ginkakibot na lamang sini sang nagpadulong ini sa talatapan sang Tricycle Franchising Regulatory Unit kag ginhambalan ini ni Mr. Andrade nga indi siya maka-renew bangud na-identify ini nga kontra-partido sang alkalde sang syudad.
Pahayag pa sang tagreklamo nga naglain ang iya nga buot sa ginhambal ni Andrade nga kontra partido ini kag ginbawi na sa iya ang iya nga City number.
Ginklaru man ni Arapan nga wala ini sang iban pa nga pangabuy-anan kundi ang pagpamasahero lamang sang tricycle sadto pang tuig 2004 kag amo na ini ang nakabulig sa iya agud mapa-eskwela ang iya mga kabataan.