Nagpabutyag sang reaksyon ang isa ka tricycle driver nahanungod sa paghulag sang presyo sang gatong.
Sa interview sang Bombo Radyo kay Ian de Pedro, iya ginpahayag nga indi bastante nga solusyon ang pagnubo lang sang presyo sang gatong bangud gulpi man ang pagtaas sini depende sa oil trading sang iban nga pungsod.
Suno kay De Pedro, kinahanglan na nga kakason ang oil deregularization law kun sa diin may puder ang mga oil companies nga i-kontrol ang presyo sang gatong.
Pahayag pa niya, ang katunga sang ila nga kita ang nagakadto lang sa gatong sang tricycle kag gamay lang nga bahin ang mabilin para sa pagkaon kag iban pa nga mga kinahanglanaon.
Nagapanawagan man ang natungdan sa gobyerno nga pamatian ang ila nga tingog kag hatagan na sang solusyon ang madugay na nga problema sa presyo sang gatong sang sektor sang transportasyon.
