ROXAS CITY – Nag-angkon sang pilas sa kamot kag tiil ang 36 anyos nga tricycle driver matapos ginpaulanan sang luthang ang iya ginamaneho nga tricycle sa Corner Magallanes-Aguinaldo-Luna Novicio Street, Barangay 1, Roxas City.
Ginkilala ang biktima kay Benjie Diestro, 36 anyos, tumandok sang Barangay Conciencia, banwa sang Panit-an nga nagamaneho sang tricycle nga may city number 1911 sang pamilya Tormon.
Mahibaluan nga masami nagapamahaw si Diestro sa isa ka tiyangge sa amo nga lugar kag naabtan ini sang suspek nga si Godofredo Hagos alyas Alog sang Sitio Dulunan, Barangay Mongpong, Roxas City nga sakay sa brown nga salakyan nga may plate number 566.
Diri kag nakabati na lamang ang mga tawo sa lugar sang tatlo ka magkasunod nga lupok sang armas luthang.
Nagdalagan pa biktima samtang ginalagas ini sang suspek kag padayon nga ginaluthang.
Nag-angkon sang pilas sa tiil kag kamot ang biktima kag nalabyan sang isa ka tricycle nga duguon nga amo ang nagpasakay sa iya kag nagdala sa Capiz Emmanuel Hospital.
Suno kay Police Corporal Gamin Unarce, imbestigador sang Roxas City Police Station, sa ila pagpangusisa sa biktima, ang nasambit nga suspek ang iya gin-utangan sang kwarta.
Posible suno diri nga ang kapaslawan sa pagbayad sang biktima ang rason sang suspek sa pagluthang sa biktima.
Dugang pa diri nga antes pa man natabo ang insidente, nakabaton na sang pagpamahog ang biktima gikan sa suspek.
Suno naman sa isa ka tricycle driver nga si Marcial, magkaupod sila nga nagapulupahuway sang biktima sa amo nga lugar sang hinali na lamang sila nakabati sang asud-asod nga lupok.
Nakibot na lamang sila sang hinali na lamang nagdalagan ang biktima samtang nagatulo ang dugo sa iya nga kamot.
Narekober naman sa ginluntaran sang insidente ang kapin tatlo ka mga empty slugs sang calibre .45 nga armas-luthang.
