ROXAS CITY – Ginabulong sa karon sa Teodoro District Hospital ang mga crew sang JPP sound system nga sakay sang Fuso truck nga naaksidente sa National Highway sang P4 Barangay Mayana, Jagna, Bohol, alas-11:15 kaina sang aga, Mayo 17.
Ginkilala ang mga sakay nga sanday:
1.Roberto Aguilar (Driver) residente sang Brgy. Bungsuan, Dumarao, Capiz
Crew:
2. Jodel Orquijo – taga-Brgy. Bungsuan, Dumarao, Capiz
3. Jessan Talanas – taga-Brgy. Calapawan, Dumarao, Capiz
4. Jhelmar Lachica – taga-Brgy. Jambad, Dumarao, Capiz
5. Chrisje Candido Hallegado – taga-Brgy. Malagab-i, Cuartero, Capiz
6. Dave Husada – taga-Brgy. Malagab-i, Cuartero, Capiz
7. Parolito Diola – taga Bohol (bayaw sang isa sa mga bata sang tag-iya sang JPP, nga yara naga-istar sa Bohol)
Sa nakuha nga impormasyon sang Bombo Radyo kay Ma’am Josephine Perocho Panes, bata sang tag-iya sang JPP sound system, ginpahayag sini nga sang May 1 nagpadulong sa Bohol ang ila crew bangud sumugod Mayo 4 tubtob Mayo 28 ang booking sang ila sounds nga gin-request sa nasambit nga lugar.
Mayo 17, kaina sang aga, padulong kuntani sa Brgy. Tubod Monte, Jagna ang truck, apang naaksidente ang mga ini sa Brgy. Mayana.
Sandig sa nakuha nga inisyal nga imbestigasyon sang mga kapulisan sa Bohol, nga samtang ginasubay sang truck ang amu nga dalan, ginapahayag nga nadulaan sang preno ang salakyan kag nagresulta sa pagbaliskad sang truck kag nagdiretso sa balay ni Ricardo Galve, 75 anyos.
Bangud sa impact sang pagbaliskad sang truck, nag-angkon sang kapilasan sa lawas ang tanan nga mga sakay sini kag ginpadangat sa ospital, apang may isa diri nga gintransfer sa Tagbilaran Hospital bangud sa naangkon nga pilas sa tiil.
Nahibaluan nga hilway sa aksidente ang tag-iya sang sound system nga si Panfilo Panes, 73 anyos kaupod si DJ Wawe, nga nagasakay sa salakyan sang iya bata nga nagasunod sa truck.
Ginklaro diri nga wala nakainom sang makahulubog nga ilimnon ang driver sang 6-wheeler truck.
Sa karon, nakapakig-angut na ang tag-iya sang JPP audio classic sa mga pamilya sang naaksidente nga crew.
