Gindagdagan sang sanctions sang administrasyon ni US President Donald Trump ang apat ka mga judges sang International Criminal Court (ICC).
Ang ginpatuman nga mga sanksyon ang may kaangtanan sa arrest warrant nga gin-isyu sa kaalyado sang Amerika nga Israel, partikular sa Israeli Prime Minister Benjamin Netanyahu kag sa mga kaso batok sa US.
Ini matapos nga nakita sang korte ang “makatarunganon nga mga rason” sang kriminal nga responsibilidad batok kay PM Netanyahu kag anay Israeli defence minister nga si Yoav Gallant sa ila mga aksyon lakip na ang “war crime of starvation” nga gingamit bilang pamaagi sang inaway sa ila daku nga opensiba sa Gaza kasunod sang sorpresa nga pag-atake sang Hamas sa Israel sang Oktubre 7, 2023.
Lakip sa apat ka mga hukom sang ICC nga gin-sanction sang US amo sanday Beti Hohler sang Slovenia kag Reine Alapini-Gansou sang Benin, nga nagpartisipar sa mga kaso nga nagresulta sa pagpaguwa sang warrant sang pag-aresto sang nagligad nga Nobyembre 2024 batok kay PM Netanyahu.
Ang duha pa ka ICC judge’s nga nagapangatubang sang sanctions amo sanday Luz Del Carmen Ibanez Carranza sang Peru kag Solomy Balungi Bossa sang Uganda, nga kabahin sang court proceedings may kaangtanan sa imbestigasyon sa mga alegasyon batuk sa US nga ginapahayag nakahimo sang war crimes sa tion sang putukputukan sang inaway sa Afghanistan.
Ang mga nasambit nga ICC judges pagadumilian sa pagsulod sa Amerika kag ang anuman nga propiedad ukon iban pa nga interes sa pinakadaku nga ekonomiya sa kalibutan nga pagabalabagan.
Samtang, sa isa ka pahayag, ginhatagan pagtamod ni US Secretary of State Marco Rubio nga pagahimuon sang Amerika ang ano man nga aksyon nga kinahanglanon agud maamligan ang iya soberanya, subong man ang Israel kag mga kaalyado sini gikan sa iligal nga aksyon sang ICC.
