Ginpirmahan ni US President Donald Trump ang isa ka executive order nga nagahatag sang sanctions sa International Criminal Court (ICC) bangud sa ginapahayag illegitimate kag wala sang basehan nga imbestigasyon nga target ang Amerika kag malapit nga kaalyado sini ang Israel.
Kalakip sa nangin sanctions ni Trump amu ang financial/asset kag visa restrictions sa mga indibidwal ukon opisyal sang ICC kag mga pamilya nga nagbulig sa imbestigasyon sang international court sa mga American national ukon mga kaalyado sini.
Ginhimo ni Trump ang pagpirma sa nasambit nga EO kadungan sang pagbisita ni Israeli Prime Minister Benjamin Netanyahu sa Washington.
Suno kay Trump, ginaabuso sang ICC ang gahum sini sa pag-isyu sang wala basehan nga arrest warrant kung sa diin target sanday Netanyahu kag anay Minister of Defense Yoav Gallant.
Wala man suno diri sang hurisdiksiyon ang ICC sa US ukon sa Israel bangud indi miyembro ang 2 sa Rome Statute ukon miyembro sang ICC.
Dugang pa sini nga wala man ginakilala sang 2 ang hurisdiksiyon sang ICC kag lunsay nga ginadumala sang 2 ka nasyon ang demokrasya kaupod ang ila militar nga strikto nga nagasunod sa laws of war.
Matandaan nagsugod ang nasambit nga tikang ni Trump matapos ang gin-isyu nga arrest warrant sang ICC batuk kay Netanyahu kag Gallant sadtong Nobyembre 2024 may kaangtanan sa ginapahayag war crimes sa Gaza, butang nga ginpanginwala naman sang Israel.
Subong man ang pag-imbestiga sang ICC sa ginapahayag war crimes nga na-commit sang Amerika batuk sa Afghanistan.
