ROXAS CITY – Makalahawat hawat ang nangin scenario sang ginpatigayon nga turn-over ceremonies kahapon sa tunga sang incoming Dadivas administration kag outgoing Celino administration sa Sangguniang Panlungsod session hall.
Ini matapos nga gintsekyar ni Mayor Elect Ronnie Dadivas kaupod ang miyembro sang transition team sa pagpanguna nanday Michelle Oropio kag Melvin Galagate ang mga dokumento nga ginturn-over sang mga department heads sa incoming administration.
Nahibaluan nga ginpamangkot tanan ni Dadivas ang mga department heads angut sa ila mga rekords kag programa nga ginpatuman sa siyudad.
Madamo sang kulang nga mga dokumento nga napaslawan nga masumiter ni Mr. Gilbert Tan, sa diin ginhatagan ini sang anum ka adlaw agud makumpleto ang mga kulang nga papeles sa pila ka mga proyekto sang syudad.
Ginapanindugan ni Tan nga wala ini nagkulang kag nagpabaya sa iya trabaho, sa diin saksi ang mga pumuluyo sa syudad kun ano sini ginhatagan sang balor ang iya trabaho.
Pagatingwaan man ni Tan nga makumpleto sini ang kulang nga mga papeles sa diin gilayon niya ini nga isumiter kay Mayor elect Ronnie Dadivas.
Kalakip man sa ginkwestyon ang General Service Office (GSO) angut sa pila ka mga utility workers nga nagaubra sa mga nagkalain-lain nga departamento.
Wala man nakaluwas ang City Engineer’s Office sa pagpamuno ni Engr. Rosano Anisco bangud sa nakit-an nga kapaltahan sa ginsumiter nga dokumento may kaangtanan sa ginpatuman nga mga proyekto sang talatapan.
Mahibaluan nga ginkwestyon man ang road concreting sa bag-o nga merkado publiko kag ang pondo sa pagbakal sang mga traffic lights.
