Puno sang kasadya kag excitement ang una nga adlaw sang SY: 2024-2025 sa Sapian National High School, para sa mga estudyante kag manunudlo.
Sa interview sang Bombo Radyo kay Zaira Mae N. Odrunia, Teacher III – Senior High School Adviser sang Grade 12 HUMSS B sang nasambit nga buluthuan, ginpahayag sini nga nangin matawhay ang umpisada sang klase sa ila eskwelahan ilabi na nga nag-ugyon man ang maayo nga tyempo.
Suno kay Odrunia, temprano pa lang madamo na nga mga estudyante ang yara na sa buluthuan kaupod ang pila ka mga ginikanan nga nagdul-ong sa ila mga kabataan kag makit-an sa ila mga nawong ang excitement sa liwat nga pagbukas sang klase.
Dugang pa sini nga handa kag padayon ang ila pagbaton sa mga estudyante nga late enrollees kag transferee.
Nagpalab-ot man ini sang pagpasalamat sa mga ginikanan kag mga nagvolunter nga nagpartisipar sa ila ginhiwat nga Brigada Eskwela kun sa diin nagsugod sadtong Hulyo 22-27 kun sa diin tinutuyo sini agud tinluan kag kay-uhon ang mga hulot klasehan sang mga estudyante antes paman ang pormal nga pagbukas sang klase.
Samtang, panugyan ni Odrunia sa mga estudyante sang Sapian NHS nga mangin isa ka responsible nga indibidwal kag sundon ang mga ginapatuman nga pagsulundan sang buluthuan.
