Nagsaka ang lebel sang unemployment kag underemployment sa Pilipinas sang Oktubre 2025, suno sa Philippine Statistics Authority (PSA). Nagsaka ang jobless rate sa 5% halin sa 3.8% sang Setyembre, nga nagakahulugan nga may 2.54 million ka mga Pilipino nga wala sang trabaho, mas mataas kun ipaanggid sa 1.96 million sang tinalikdan nga bulan.
Kadungan sini, ang underemployment rate nagsaka man sa 12% halin sa 11.1%, ukon 5.81 million ka mga mamumugon ang kulang sa oras ukon trabaho.
Suno kay National Statistician Claire Dennis Mapa, kabahin sang kabangdanan amo ang pagtaas sang numero sang mga bag-o sulod sa labor force, nga naglab-ot sa 51.16 million.
Nagtaas naman ang trabaho sa pila ka sektor kasubong sang public administration, accommodation kag food service, agrikultura, manufacturing, kag pagpangisda. Samtang, may mga sektor man nga nakaeksperyensya sang job losses, kalakip ang other services, wholesale kag retail trade, kag mining.
Dugang pa ni Mapa, masami nga nagaayo ang employment sa “ber” months bangud sa pagtaas sang konsumo subong nga Paskwa.
