ROXAS CITY – Ginatudlo sa nagalaylay nga live wire sang Capiz Electric Cooperative (Capelco) ang kamatayon sang 67-anyos nga mangunguma nga magapadulong kuntani sa iya ulumhan sa Barangay Badiangon, President Roxas, Capiz.
Ginkilala ang biktima kay Jolito Bundad Sr., nga nag-angkon sang paso matapos nasangit sang live wire.
Ginpahayag ni Inspector Gerome Manahan, hepe sang President Roxas Municipal Police Station nga nagaguwa sa imbestigasyon sang pulisya nga gikan sa ila balay ang biktima kag magapadulong kuntani sa iya ulumhan sang aksidente nga masangit sang naglaylay nga live wire.
Ginapatihan nga wala sini madiparahan ang kuryente sang Capelco.
Nahibaluan nga gindala pa sa ospital ang biktima, apang gindeklara nga dead on arrival sang attending physician.
