Nagpirma ang Estados Unidos kag Ukraine sang kasugtanan nga magahatag sa Washington sang access sa talagsahon nga mga mineral sang Kyiv, kabaylo sang pagtukod sang isa ka pondo sang pamuhunan sang Estados Unidos sa Ukraine agud mapasanyog ang ekonomiya nga nahalitan sang inaway.
Ginkumpirmar sang US Treasury Department ang kasugtanan sang Miyerkules, samtang ginapamatud-an man ang suporta sang administrasyon ni Trump para sa kalinong kag pagbangon sa Ukraine. Kabahin man ini sang katuyuan sang US nga masiguro nga indi makabenepisyo ang sin-o man nga nagasuporta sa agresyon sang Russia.
Suno kay Ukrainian Economy Minister Yulia Svyrydenko, ang Ukraine nagahupot sang bug-os nga kontrol kag pagpanag-iya sang kinaugali nga mga manggad sa idalom sang kasugtanan sa diin ang subsoil resources maathag nga ginapanag-iyahan sang estado.
Ginpirmahan ang kasugtanan matapos ang pila ka bulan nga negosasyon kag na-delay sang Pebrero sang na-delay ang pagpirma sa Washington bangud sa tensyon sa Oval Office meeting nanday Presidente Zelensky kag Trump.
Ginpahayag ni US President Trump nga importante nga protektahan ang interes sang US kabaylo sang bulig sa Ukraine.
Mas importante ini sangsa $350 bilyones, gani luyag sini nga siguraduhon nga indi sila mahuy-an. Gintudlo man niya nga ang Russia mas daku kag mas mabakod, amo kon ngaa importante ang amo nga kasugtanan.
Ginabulubanta nga ang kabug-usan nga bulig sang US sa Ukraine halin sang ginsalakay ini sang Russia sang 2022 nagsobra na sa $123 bilyones.
