Gin-anunsyo ni US President Donald Trump nga gindakop na si Venezuela President Nicolas Maduro nga ginakabig sang Estados Unidos bilang isa ka terorista upod ang iya asawa nga si First Lady Cilia Flores.
Sa isa ka pahayag gikan sa iya Truth Social account, ginkumpirmar sang Presidente sang Estados Unidos nga nangin madinalag-on ang malapnagon nga airstrike nga ginpatigayon sang Amerika batok sa Venezuela, nga ginaalegar nagresulta sa pag-aresto sa lider sini nga si President Maduro upod ang iya asawa kag ginpalupad pa gwa sang pungsod.
Dugang oa ni Trump, nga ginpatigayon ang operasyon sa kooperasyon sang US Law Enforcement.
Base sa report sang international media, ginpahayag sang pila ka mga opisyal nga gindakop si Maduro sang Delta Force sang US army, ang top counter terrorism unit sang US military.
Suno naman sa isa ka Republican Senator, ginpahayag ni US Secretary of State Marco Rubio nga magapangatubang sang trial si Maduro sa America may kaangtanan sa criminal charges batok sa iya kag wala sang ginalauman nga aksyon batuk sa Venezuela.
Samtang, sa bahin naman sang gobyerno sang Venezuela, wala pa sang kumpirmasyon angut sa gin-alegar pagdakop kay Maduro.
Bilang sabat sa mga pag-atake sang mga America, gin-anunsyo ni Venezuela Defense Minister Vladimir Padrino López ang gilayon nga pagdeploy sang ila mga military forces sa bug-os nga pungsod.
Gin-anunsyo man sang Defense Minister nga padayon ang pagtipon sang gobyerno sang mga impormasyon may kaangtanan sa mga napatay kag napilasan nga mga indibidwal kag sa mga sibilyan nga lugar nga ginaalegar naigo.
Ginpanindugan sang opisyal sang Venezuela nga punggan nila ang presensya sang dumuluong nga tropa sa ila pungsod kag nagdeklarar na sang national emergency ang gobyerno sang Venezuela kasunod sang strikes sang mga Estados Unidos.
