Natalana nga magabiyahe si US President Donald Trump padulong sa Anchorage, Alaska subong nga gab-i para sa isa ka ginahulat nga makasaysayan nga summit sa tunga niya kag sang Russian President Vladimir Putin.
Suno sa White House, natalana nga maghalin si Trump sa Estados Unidos kag magbiyahe pakadto sa Alaska sa alas 6:45 sang aga, oras sang Amerika ukon alas 6:45 sang gab-i. subong nga gab-i, Biyernes, Agosto 15, oras sa Pilipinas.
Ginalauman nga magabalik sa White House si Trump sa Sabado sang aga, Agosto 16.
Ang pila sang delegasyon sang Russia nagsugod na sa pag-abot antes sang natalana nga summit, lakip si Russian Foreign Minister Sergey Lavrov.
Ginalauman man nga magatambong gikan sa Russia amo si Defense Minister Andrey Belousov, kag ang sovereign wealth fund chief Kirill Dmitriev.
Wala sang mga tiglawas ukon delegasyon gikan sa bahin sang Ukraine ang ginapaabot nga magatambong.
Ang isa-sa-isa nga pagkit-anay nanday Trump kag Putin magasugod sa Joint Base Elmendorf-Richardson, ang pinakadaku nga base militar sa Alaska.
Ini ang pagasundan sang sinapol sang mga delegasyon kag joint press conference.
Ginalauman nga istoryahan nanday Trump kag Putin ang posible nga kasugtanan agud tapuson ang giyera sa Ukraine.
