Nagsugod na sa pagbaligya sang ila mga produkto ang pila ka mga vendors nagikan sa Burgos Talipapa padulong sa bag-o nga pwesto sang mga ini sa Teodoro Arcenas Trade Center (TATC) subong nga adlaw, Nobyembre 5.
Sa interview sang Bombo Radyo kay alyas Mark, vendor sa Burgos talipapa nga nakahamtang na karon sa TATC, ginapahayag sini nga mas ukon menos 300 ka mga vendors sang isda, karne, utanon, prutas, kag iban pa ang nag amat-amat na nga nagbalhin kag nagsugod sa pagbaligya.
Madumduman nga ginpangbalhin ang mga ini bangud sa nagaginutok na ang alagyan sa ila anay nga nahamtangan.
Mahibaluan nga sumugod subong nga adlaw, Nobyembre 5 tubtob Nobyembre 14 sini nga tuig, wala ini sila sang pagabayaran sa ila sini nga renta sa bag-o nila nga plastaran agud maka-adjust sila sang maayo sa dalagan sang ila nga negosyo sa sulod sang bag-o sini nga mga pwesto.
Apisar nga kalabanan sa ila ang nagapanimag-o sa ila bag-o nga ginahamtangan, dako sa gihapon ang pagpasalamat sang mga ini bangud yara na sila sa mas komportable nga kahimtangan.
