ROXAS CITY – Nag-apelar karon ang bise gobernador sang probinsiya sang Capiz kag presidente sang Grains Retailers Confederation of the Philippines (GRECON) sa mga kunsumidor nga i-patronize ang locally produced rice sang mga mangunguma.
Ginhimo ni Vice Governor James Mitang Magbanua ang pahayag bangud sa epekto sang implementasyon sang Rice Tariffication Law sa mga mangunguma.
Ginpahayag sang opisyal nga na-obserbahan sini nga bisan mahal ang imported rice sa merkado mas ini ang ginapili nga baklon sang mga kunsumidor bangud sa maayo nga kalidad sini.
Gindugang ni Magbanua nga wala sang nahatag nga maayo nga resulta ang implementasyon sang amo nga laye bangud iban nga mga function sang National Food Authority (NFA) ang gindula kalakip diri ang ila function nga pagregulate sang presyo sang bugas merkado
.
Sa karon nasentro ang obligasyon sang ahensiya sa pagpamakal sang palay sa mga local farmers nga himoon ini nga stock sang gobyerno agud may gamiton sa mga relief assistance sa tion magluntad ang kalamidad.
Nagapati ang bise gobernador nga dapat antes ginpatuman ang RTL, ginpaidalum sa trainings ang mga mangunguma kag gin-equipped sila sang machinery agud mangin competitive kag indi magdepende sa iban nga mga rice importing countries kasubong sang Vietnam,Thailand kag Myanmar.
Ginapanindugan pa sang opisyal nga indi pa handa ang mga local farmers para maka-compete sa iban nga mga pungsod gani sa baylo nga makabulig ang RTL nakapalain pa ini sa mga mangunguma.
Kun sadto nagapadala pa sang bugas ang Capiz, nga rice producing province sa iban nga mga probinsiya, apang subong indi na mahimo ini bangud mismo naga-import na sang bugas ang mga traders.
