ROXAS CITY -Nagalaum ang chaiman sang Committee on Environment nga makabulig sa publiko ang bag-o lang ginpapasar nga ordinansa natuhoy sa pag-regulate sang videoke kag pagpatunog sang mga sound system sa tion sang kagab-ihon sa siyudad.
Sa interview sang Bombo Radyo kay City Councilor Jericho Celino ginpahayag sini nga tuman ang iya kalipay matapos ginpapasar ini sang Sangguniang Panlungsod.
Ginakabig ni Celino nga isa ini sa mga mayor nga ordinansa nga ginpapasar sa siyudad bangud masami ini nagakahinabo nga problema sa mga kabarangayan.
Matandaan nga sandig sa “Videoke Ordinance of 2020” pagadumilian na ang pagvideoke ukon pagpatunog sang mga sound system humalin alas 10 sa gab-e tubtob alas 5 sang aga.
Apang sa mga luyag mag-videoke bangud may yara sang okasyon mahimo lamang nga magpangayo sang permit gikan sa barangay.
Sa nasambit nga ordinansa may yara sang multa ang sin-o man magalapas sa diin magabayad ini sang P3,000 kag confiscation sa 1st offense, P4,000 kag confiscation sa 2nd Offense kag P5,000 kag confiscation sa 3rd Offense.
