Ginmanduan sang Energy Regulatory Commission (ERC) ang gilayon nga pagpasarado sa Siquijor Island Power Corp. (Sipcor), isa ka kompanya nga ginapanag-iyahan sang Villar Group, bangud sa serye sang mga paglapas sa regulasyon kag kontrata. Sa gahom sang kasuguan sang Agosto 29, ginbawi sang ERC ang provisional authority sang Sipcor nga mag-operate sa probinsya.
Base sa kalatas nga ginpaguha sang ERC kag National Electrification Administration (NEA), napaslawan nga makakuha sang Certificate of Compliance ang Sipcor, indi maayos ang pag-mentinar sang pasilidad rason nga nag-angkon sang madugay nga brownout, kag wala man ini nagsunod sa mga patakaran sa pag-report. Ginpahayag nga naglapas man ang kompanya sa mga kasugtanan sini sa Province of Siquijor Electric Cooperative Inc. (Prosielco).
Personal nga gindul-ong ang kasuguan nanday ERC Chairperson Atty. Francis Saturnino Juan, Department of Energy (DOE) Undersecretary Mario Marasigan, kag NEA Administrator Antonio Mariano Almeda agud ipa-untat ang operasyon sang Sipcor.
Bilang sabat, ginpadasig sang NEA, Prosielco kag iban pa nga partner agencies ang pagpatindog sang mga bag-o nga planta sang kuryente sa mga banwa sang Larena, Lazi, kag Candanay. Sa karon, ang mga bag-o nga pasilidad ang nakahatag sang kabug-usan nga 15.75 megawatts (MW) sang suplay—sobra pa sa ginakinahanglan nga 9.5 MW sang bug-os nga probinsya.
Nagpadala man ang NEA sang mga linemen nagikan sa mga kalapit nga mga kooperatiba sa Cebu agud magbulig sa pagkay-o kag pag-energize sang mga bag-o nga pasilidad.
Wala pa sang pahayag ang Villar Group angut sa isyu sa pihak sang mga pagpangayo para sa komento.
