Ginkumpirmar sang mga otoridad nga ang viral dashcam footage sa Kennon Road, Benguet, sa diin ang anay Department of Public Works and Highways (DPWH) Undersecretary Catalina Cabral nakita nga nagapungko sa dalan antes siya napatay sang Disyembre 18, nagasanto sa una nga mga natukiban sang National Bureau of Investigation (NBI).
Ginkumpirmar man sang Philippine National Police (PNP) kag Department of the Interior and Local Government (DILG) Secretary Jonvic Remulla nga matuod ang selfie photo sang driver ni Cabral kag nagasanto sa persona sa video.
Suno kay PNP acting chief Police Lt. Gen. Jose Melencio Nartatez Jr., maathag na ang identity sang bangkay kag ginapahayag nga nakatutok ang PNP sa pag-imbestigar kun ano gid ang natabo sa anay opisyal sang DPWH.
Nagabulig man suno sa iya ang Philippine National Police sa pagtipon sang mga ebidensiya may kaangtanan kay Cabral nga posible makabulig sa imbestigasyon sa mga ilegal nga flood control projects.
Magluwas sini, ginpatigayon man ang crime scene reconstruction sa Kennon Road, kag gin-usisa sang NBI ang hotel room ni Cabral sa diin nakumpiskar ang iya mga personal nga gamit kag mga dokumento.
Samtang, ang bangkay ni Cabral yara na sa memorial chapel sa Quezon City.
