ROXAS CITY – Ginkabalaka sang publiko sa Russia ang mas hugot nga pagdumili sa paggamit sang Virtual Private Network ukon VPN, labi pa sang matapos nga nag-igo ang isa ka makusog nga 8.8 magnitude nga linog sa sidlangan nga bahin sang pungsod.
Sa interview sang Bombo Radyo kay Bombo Genevive Dignadice, International Correspondent sa Russia, iya ginpahayag nga indi lamang halit kag kabalaka ang gintuga sang linog kundi pati man ang pagkadula sang access sa madasig nga impormasyon bangud sa ginapatuman nga VPN ban sang gobyerno.
Suno sa iya, sa panahon sang kalamidad, tuman ka importante sang real-time kag matuod nga impormasyon.
Apang bangud sa mabudlay na nga paggamit sang VPN, nabudlayan ang mga pumuluyo nga makakuha sang balita nagikan sa independent sources.
Nag-igo ang linog sa malayo nga sidlangan nga rehiyon sang Russia, kun sa diin limitado na ang koneksyon sa mainstream media.
Mas labi pa nga nagbudlay ang komunikasyon sa mga pinalangga sa kabuhi kag mga himata kag ang pagkuha sang updates hanungod sa relief operations bangud sa internet restrictions.
Paathag sang Russian government, katuyuan sang VPN ban ang pagpugong sa impluwensiya sang pangayaw kag proteksyon sang seguridad sa cyberspace. Apang para sa mga netizen kag civil society groups, ang tikang nga ini mas nagatuga sang peligro sa panahon sang emerhensya.
Padayon ang panawagan sang pila ka sektor nga liwat pag-isipan sang gobyerno ang patakaran, labi na kun nangin upang na ini sa kaluwasan kag ihibalo sang publiko kada may kalamidad.
Interviewed by Bombo Francis Biñas
