Ginkakas sa puwesto ang isa ka pulis nga vlogger sa Talisay City, Cebu matapos nga naghimo sang kontrobersyal nga content kun sa diin gina-engganyo niya ang mga netizen nga maghampang sang “bring me” kag magdala sang drug user ukon pusher kabaylo sang kwarta.
Sa isa ka video, makit-an ang nasambit nga pulis nga nagatan-ay sang P2,000 sa sin-o man nga makadala sang drug user kag P5,000 naman para sa street-level pusher.
Wala ini maluyagan sang pamunuan sang Philippine National Police (PNP) nga nagsiling nga wala ini sa insakto nga operasyon sang pulisya.
Suno kay PNP acting chief Lt. Gen. Jose Melencio Nartatez Jr., gina-imbestigaran na sang Anti-Cybercrime Group (ACG) kag Directorate for Investigation and Detective Management (DIDM) ang insidente.
Nakuha pa sang PNP ang kopya sang video antes ini mapanas sa Facebook page sang pulis nga may masobra 400,000 followers. Naguwa man nga may yara pa ini sang iban pagid nga mga content sa diin nga gina-engganyo naman sini ang iya nga mga followers nga magdala sang mga indi rehistardo nga armas.
Suno kay PNP spokesperson Police Brigadier Gen. Randulf Tuaño, ginkakas na sa puwesto ang nasambit nga pulis kag ginapa-esplikar man pati ang iya nga hepe.
