ROXAS CITY – Nagsabat ang barangay kagawad sang Barangay Sta. Cruz, Ivisan, Capiz natuhoy sa reklamo sang mga benepisyaryo sang Social Amelioration Program (SAP) sang Department of Social Welfare and Development (DSWD) nga pagpangkaltas sang P1, 000 sa ila nabaton nga P6, 000 nga ayuda.
Suno kay Barangay Kagawad Norma Arnaiz, matuod nga nagpangbalay-balay sila kag nagpangganyat sa mga benepisyaryo nga kun mahimo makahatag sila sang P1, 000 nga igahatag sa mga wala makabaton sang ayuda.
Apang ginklaro sini nga wala nila ini gindayon matapos nga nakabinag-binag nga indi nagakadapat kag may mga kagastuhanan man ang kada benepisyaryo nga gamitan sang amo nga ayuda.
Matandaan nga una nga nagreklamo sa Bombo Radyo ang pila ka concerned citizen kag nagapamatuod gid nga sila ang ginpangkaltasan sang P1, 000.
Sang ginlab-ot naman sang Bombo Radyo si Punong Barangay Nicasio Ralph ‘Bubot’ Muñoz, iya ginpanginwala ang amo nga alegasyon kag ginpahayag sini nga nahangpan niya nga nagasupak ini sa pagsulundan sang DSWD.
Apang matapos nga ginpanginwala ini sang kapitan, may pila ka benepisyaryo nga nagpadala sa Bombo Radyo sang listahan kun sa diin nakapirma ang mga ginpangkaltasan sang P1, 000.
May ginpadala man nga kuha nga video kun sa diin makit-an nga mismo ang konsehal nga si Arnaiz ang nagahambal nga kinahanglan sang mga benepisyaryo sang P1, 000 gikan sa P6, 000 nga ila nabaton.
Wala naman ginpanginwala ni Arnaiz ang nasambit nga video apang suno sa iya, nagpangganyat lamang sila kag sa ulihi wala man nila gindayon ang pagpangkaltas sa mga benepisyaryo.
(Photo from web)
