ROXAS CITY – Dako ang mangin epekto sa kooperatiba sang Montecarba kag sa iban pa kun madayon ang plano sang gobyerno nga mag-import sang asukar gikan sa iban nga pungsod.
Ini ang ginpahayag ni Mrs. Teresita Billonid, Presidente sang Montecarba Agrarian Reform Cooperative sang ma-interview sang Bombo Radyo.
Suno diri, tuman nga kapiyerdihan sa ila capital kun indi malang ini mapuslan nga inug-harvest na kuntani sa tunga-tunga sa bulan sang Oktubre, kadungan man sa bulan nga plano mag-import sang asukar sang gobyerno.
Gintul-id sini nga magapanumbalik naman ang asukar sa probinsya sang Capiz bangud kun madeliver na nila ang mga tubo sa Capiz Sugar Central, sugudan man ang milling indi lang sa Rehiyon VI amu man sa iban, gani para sa iya indi na kinahanglan nga mag-import.
Pananglitan suno diri nga madayon ang import, may posibilidad nga bayluhan nila sang lain nga crops ang ila gina-tanom bangud suno diri ano pa ang rason nga magtanom pa sila sang tubo kun mausik lang sila sang kapoy kag mapiyerde kun madayon ang importasyon.
Mahibaluan nga ang Montecarba may yara sang 108 hectares nga kadutaan kun sa diin 70-80 hectares lamang diri ang ila ginatamnan sang tubo sa bahin sang Sitio Culilang President Roxas kag Sitio Dulangan, Pilar, Capiz rason nga gamay lang ang ila ginansya bangud nagabayad pa sila sa mga trabahador kag manugtapas.
Dugang pa sini nga wala nagapabaya ang DAR sa ila nga mga ARB’s kag ginapanugyan niya sa mga nagatago sang suplay sang asukar nga untatan na ang ila ginahimo bangud nagakadalahig sila.
