Arestado ang walo ka mga kalalakinhan sa isa ka joint operation sang Ivisan Municipal Police Station kag Capiz Provincial Bantay Dagat sa territorial waters sang Barangay Balaring, Ivisan, Capiz.
Ang nagkaladakpan amo sanday alyas ‘Rocky’, 37-anyos, boat captain; alyas ‘Rommel’, 35-anyos; alyas ‘Aine’, 39-anyos; alyas ‘Regie’, 53-anyos nga lunsay residente sang Brgy. Libas, Roxas City; alyas ‘Gaspar’, 59-anyos; alyas ‘Antonio’, 59-anyos; alyas ‘Anthony’, 36-anyos, nga lunsay residente sang Brgy. Barra, Roxas City; kag alyas ‘Mark’, 26-anyos, nga residente sang Manda-on, Masbate.
Sa impormasyon nga nakuha sang Bombo Radyo nagikan sa Ivisan Municipal Police Station, ginapahayg nga nadakpan ang mga ini nga nagapatigayon sang iligal nga pagpangisda gamit ang “trawl” nga wala sang nagakaigo nga permit.
Nakuha sa paghinakop sang mga ini ang isa ka motor banca nga may Fosu 6D14 diesel engine nga nagabalor sang ginabulubanta P430,000, fishing gear nga nagabalor sang P120,000, kag 15 kilos sang nagkalain-lain nga sahi sang isda nga nagabalor sang P1,500.
Sa subong, gindala ang mga nadakpan kag ang ila nga mga kagamitan sa Capiz Provincial Bantay-Dagat Sub Station sa Brgy. Balogo, Pilar, Capiz para sa nagakaigo nga disposisyon.
