ROXAS CITY -Ginkompirmar ni City Mayor Ronnie Dadivas nga may yara sang walo ka mga panibag-o nga kaso sang COVID-19 ang nagdugang sa siyudad sang Roxas.
Suno sa official statement ni Dadivas nga lunsay mga Returning Overseas Filipinos ang walo ka mga nagpositibo.
Nahibaluan nga 3 diri ang residente sang Barangay Tiza, 2 sa Barangay Punta Tabuc kag tig-isa naman sa Barangay Milibili, Tanque kag Barangay I, sining siyudad.
Sandig sa official statement sang nasambit nga alkalde nga isa ka 28-anyos nga lalaki nga OFW repatriate nga residente sang Barangay Tiza sining siyudad ang nagpositibo sa diin may yara ini sang travel history sa Kuwait kag Metro Manila.
Ikaduha ang 43-anyos nga Seafarer nagikan sa Kuwait kag Doha, Qatar kag residente sang Barangay Punta Tabuc, sining siyudad.
Ikatatlo ang 50-anyos nga lalaki nga Seafarer sang Barangay Tanque sining siyudad kag may travel history sa Kuwait kag Doha, Qatar.
Ikaapat ang 29-anyos nga nurse nga babaye gikan sa Kingdom of Saudi Arabia kag residente sang Barangay Milibili sining siyudad.
Ikalima ang 50-anyos nga seafarer kag residente sang Barangay Tiza kag may travel history sa Japan, Cebu kag Manila.
Ikaanom ang 37-anyos nga lalaki nga OFW gikan sa Jeddah kag residente sang Barangay I sining siyudad.
Ikapito ang 33 -anyos nga babaye nga nurse gikan sa Kuwait kag residente sang Barangay Tiza sining siyudad.
Ikawalo ang 38-anyos nga OFW nga gikan sa Saudi Arabia kag residente sang Barangay Punta Tabuc apang nag-negatibo naman sa RT-PCR test subong nga adlaw.
Ginpasalig naman ni Dadivas nga wala makaguha ang mga nag-positibo kag nagapabilin sa ila tagsa ka mga quarantine facilities.
Sa karun, may yara na sang kabug-osan nga 18 ka mga kaso ang napagkit sa siyudad sang Roxas
