Nagdangat na sa 18 katawo ang patay sa nagluntad nga wildfires sa Southeastern Region sa South Korea base sa report sang local media subong nga adlaw, Miyerkules, Marso 26.
Pila sa mga napatay ang nagtinguha pa kuntani nga makapalagyo sa naga-dabadaba nga kalayo apang nagbaliskad ang ila nga salakyan base sa report.
19 ka mga indibidwal ang ginreport man nga napilasan samtang masobra 23,000 ka mga residente ang ginpa-evacuate kag ginatos ka mga estraktura ang nahalitan.
Gindesignar sang gobyerno sang SoKor ang mga apektado nga lugar bilang special disaster zones.
Una sini, nagsugod nga naglapta ang nasambit nga wildfires sa rehiyon sadtong Martes, Marso 25, nga gintunaan sang pwersa nga pag-evacuate sang mga residente sa ila mga puluy-an kag nagsunog man sa kaiping nga mga lugar.
Ginsaylo man sang mga awtoridad ang linibo ka mga priso gikan sa mga prisohan.
Nagpasalig man si Acting President Han Duck-soo nga magapadala sang firefighting helicopters kag ground personnel agud mapalong ang wildfires nga nagdagko nga kalayo bangud sa mabaskog nga hangin kag mainit nga panahon.
Samtang, ang mga opisyales sang gobyerno sang SoKor nagasuspetsa nga ang kabangdanan sang pila ka mga wildfires, kalakip na ang mga sa Uiseong kag Ulsan, bangud sa human error, nga posible rason sa paggamit sang kalayo samtang nagahawan sang matag-as nga hilamon sa mga sementeryo ukon posible sparks gikan sa welding work.
