DAVAO CITY – Ginakalipay sang Department of Education Region 6 ang pag-angkon sang mga atleta naggikan sa rehiyon nga nangin record breakers sa Palarong Pambansa 2019 sa Davao City.
Ginpahayag sa Bombo Radyo ni Dr. Leah Belleza, spokesperson sang DepEd Region 6 nga maayo ang performance karun sang mga atleta naggikan sa rehiyon bangud sa una nga duha ka adlaw pa lamang sang hinampang, tatlo na sa ila ang nakaguba sang mga Palaro records.
Una diri, nakahimo sang bag-o nga record sa Long Jump Secondary Girls si Trexie Dela Torre sang Negros Occidental sa iya napagkit nga 5.84 meters.
Record breaker man si Jamela De Asis nga tumandok man sang Negros Occidental sa Shot Put Secondary Girls matapos makapagkit sang 12.30 meters.
Isa pa ka Negrense nga si Alexi Kouzenye Cabayaran ang nakahimo sang bag-o nga record sa swimming sa 200 meter freestyle Elementary Girls nga nakapagkit sang 2:15:76.
Suno pa kay Belleza, dako ang nabulig diri sang maid-id nga paghanas sang mga atleta, coaches kag suporta nga ginhatag sang lokal nga gobyerno kag sang regional office sang DepEd.
Gintuad pa niya nga kada atleta nga makakuha sang bulawan nga medalya sa Palaro ang makabaton sang P1,000 nga insentibo naggikan sa DepEd samtang mahimo nga makabaton pa gid sila sang dugang nga insentibo naggikan sa ila mga lokal nga gobyerno.
