ROXAS CITY – Patay na sang nasapwan ang 31 anyos nga babaye matapos malumos sa suba kun sa diin tumampilak ini kaupod ang iya live-in partner kasunod sang pagkabunggo sang ila ginasakyan nga tricycle sa isa ka tulay sa Barangay Tapulang, Maayon, Capiz.
Ginkilala ang napatay nga biktima nga si Joan Belvis, samtang pilason naman ang live-in partner sini nga si Mark Cacatian, 31 anyos, lunsay mga residente sang Barangay Pantalan, President Roxas, Capiz.
Base sa nakuha nga impormasyon sang Bombo Radyo Roxas, gikan ang mga biktima sa ila nga paryente sa Barangay Sinabsaban, Cuartero kag pauli na kuntani sakay sa ila tricycle sang ginaalegar nga nadulaan sang kontrol sa manubela si Cacatian rason nga nabunggo ini sa tulay.
Bangud sang kabaskugon sang pagkabunggo, tumampilak ang mga biktima sa suba.
Maswerte nga nakatakas si Cacatian apang wala na nakalutaw pa ang live-in partner sini nga si Belvis.
Sa ginpatigayon nga search and retrieval operation sang mga otoridad, narekober ang lawas ni Belvis nga nagapautaw-utaw kag wala na sang kabuhi kapin sa 4 kilometros ang kalayuon sa ginluntaran sang aksidente.
May nakit-an nga pilas sa panga ni Belvis kag ginapatihan nga nabali ang tuhod sini nga posible rason sang iya pagkalumos samtang nag-angkon naman sang pilas sa natuo nga porsyon sang iya nawong kag nawala nga tiil si Cacatian.
