TAPAZ, CAPIZ- Patay ang isa ka lalaki sa nagluntad nga pagbungguanay sang motorsiklo kag pick-up nga salakyan sa Brgy Taft, Tapaz, Capiz.
Ang napatay amo si alyas ‘Jason’, 28-anyos, driver sang motorsiklo, nga residente sang Barangay Malitbog Bingawan, Iloilo, samtang pilas naman ang naangkon sang mga backriders sini nga sanday alyas ‘Nene’, 48-anyos nga residente sang Barangay Maganhop, Bingawan, Iloilo, kag alyas “Pau-Pau’, 18-anyos nga residente sang Barangay Poblacion, Tapaz, Capiz.
Samtang, ang driver naman sang pick-up amo si alyas ‘Thoto’, 60-anyos kag residente sang Barangay Daan Banwa, Tapaz Capiz.
Sa interview sang Bombo Radyo kay Police Captain Joebert De Los Reyes, Hepe sang Tapaz Municipal Police Station, ginpahayag nga samtang ginasubay sang pareho nga mga behikulo ang separado nga linya sang dalan sa amo nga lugar, hinali nalang nga nadulaan sang kontrol ang motorsiklo rason nga bumunggo ini sa nawala nga bahin sang front bumper sang pick-up.
Bangud sa impact, nag-angkon sang pilas sa magkatuhay nga parte sang lawas ang sakay sang motorsiklo nga gilayon naman nga ginrespondehan sang mga katapo sang Tapaz Fire Station Ambulance kag LGU ambulance kag ginpadangat sa Tapaz District Hospital apang, gindeklarar nga ‘dead on arrival’ sang doktor nga nag-atendir ang driver sang motorsiklo.
Samtang, gilayon naman nga nagsurrender sa mga kapulisan ang driver sang nasambit nga pick-up.
Nahibaluan nga base sa imbistigasyon sang mga kapulisan, ginapahayag nga madasig ang pagpadalagan sang motorsiklo.
Sa karon, yara na sa kustodiya sang Tapaz Municipal Police Station ang nasambit nga driver sang pick kalakip sang mga behikulo nga naulamid, samtang nagapabilin sa ospital ang mga backriders kag nagapadayon man ang imbestigasyon sang mga kapulisan angot sa nasambit nga insidente.
Interviewed by Bombo Jessa Mae De Los Santos
