Isa sa kada napulo ka bag-o nga kaso sang human immunodeficiency virus ukon HIV nga narekord sa una nga quarter sang tuig ang nakuha paagi sa transactional sex ukon sex nga may bayad.
Base sa datos nga ginpagwa sang HIV and AIDS Surveillance of the Philippines, nagaguwa nga naglab-ot sa 5,101 ka kaso sang HIV ang na-record humalin sang Enero tubtub Marso sini nga tuig.
Gikan sa nasambit nga numero, tubtob sa 596 ka kaso ukon katumbas sa 12 porsyento ang nakuha pinaagi sa transactional sex sa nakaligad nga 12 ka bulan.
Lakip diri ang mga nagabayad kag ang mga ginabayaran para sa sex.
Sugod sang ginreport ang transactional sex sang 2012, may kabug-usan nga 16,586 ka kaso ang narekord.
Suno sa Department of Health, 54% ukon 8,962 sa kabug-usan nga kaso ang may history sang transactional sex kag na-diagnose humalin 2020 tubtob 2025.
Una na nga nagpanawagan ang DOH sa Malacanang nga magdeklarar sang Health Emergency agud masabat ang padayon nga pagtaas sang HIV Cases sa pungsod.
