ROXAS CITY-Ginkompirmar ni Provincial Disaster Risk Reduction and Management Officer Mrs. Judy Grace Pelaez nga may yara sang 135 ka mga indibidwal gikan sa Metro Manila ang nagpauli sa probinsiya gikan sa Metro Manila subong nga adlaw, Agosto 20, 2020.
Sa interview sang Bombo Radyo sa kay PDRRM Officer Mrs. Judy Grace Pelaez nga sakay sa special flight ang nasambit nga mga indibidwal kun sa diin ginpatigayon pinaagi sa provincial government sa pagpanguna ni Capiz Governor Esteban Evan Nonoy Contreras.
Suno kay Pelaez nga kadam-an sa mga nagpauli amo ang mga Locally Stranded Individual’s ukon LSI’s apang may yara man sang pila ka mga Returning Overseas Filipinos ukon ROF’s kag mga Authorized Person Outside Residence ukon APOR.
Ginpahayag naman ni Pelaez nga may yara sang pila ka mga indibidwal nga wala nakasakay sa nasambitan nga flight bangud sa kakulangan sang pila ka mga rekisitos.
Mahibaluan nga kalakip sa mga kinahanglanon nga mga rekisitos amo ang medical certificate, travel authority kag letter of acceptance.
Samtang, gin-athag naman ni Pelaez nga wala na ginpaidalom sa rapid test ang nasambit nga mga indibidwal antes nagpauli sa probinsya.
Nagpanindugan naman si Pelaez nga may yara sang koordinasyon sa talatapan sang magkatuhay nga mga LGU’s ang pagpapuli sa nasambit nga mga indibidwal.
Dugang pa sini nga duha tubtob tatlo ka adlaw ginapaguwa sang mga airline companies ang ila manifesto kun sa diin gilayon nila nga ginapadala sa mga LGUs
Samtang, apisar nga may yara sang nag-abot nga mga indibidwal sa probinsya may yara naman sang naghalin nga 125 ka mga indibiwal nga nagpadulong sa Metro Manila.
