Padayon nga nagapalayo ang Bagyo Isang sa Luzon, apang 15 ka mga lugar sa pungsod ang yara sa gihapon sa idalom sang Signal Number 1.
Suno sa Philippine Atmospheric, Geophysical and Astronomical Services Administration (PAGASA), ang sentro sang bagyo ang nahamtang sa kalayuon nga 120 kilometros West Northwest sang Bacnotan, La Union.
May kabaskugon ini sang hangin nga nagalab-ot sa 55 kph kag pagmadlos nga nagalab-ot sa 85 kph.
Ang signal number 1 ginapataas sa mga masunod nga lugar: Cagayan lakip ang Babuyan Islands, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, Carranglan kag Lupao sa Nueva Ecija.
Ginalauman nga magaguwa ang bagyo sa Philippine Area of Responsibility subong nga aga ukon karon sa hapon sang Agosto 23.
Mas magabaskog pa ini samtang nagapalapit sa kadagatan sang Hainan, China.
