Nagdangat na sa 150 Pilipino ang na-displace sa nagapadayon nga wildfires sa Los Angeles, California USA nga nagresulata sa kamatayon sang 24 ka indibidwal.
Sa isa ka interview, gin-report ni LA Consul General Adelio Angelito Cruz nga kalakip ang nasambit nga mga Pinoy sa kinahanglan nga ipaidalom sa mandatory evacuation.
Padayon naman nga nakig-angut ang Konsulada sa mga Filipino-American community nga yara sa amu nga lugar.
Gin-akon naman sang Consul General nga may pila ka mga Pilipino sa LA ang undocumented kag pipila lamang ang may ara sang insurance.
Apang, ginsiguro sang Philippine official nga prayoridad sang California authorities nga masalbar ang sin-o man nga ngakinahanglan sang bulig apisar sila man ang indi dokumentado.
Sa bahin naman sang gobyerno ng Pilipinas, ginpahayag ni Consul General Cruz nga nahatagan siya sang otoridad gikan sa Department of Foreign Affairs (DFA) nga maghatag sang pinansiyal nga bulig nga $200 ukon kabaylo sang P11,731.20 bilang emergency assistance para sa kada apektado nga Pilipino pambakal sang ila nagapanguna nga kinahanglanon kasubong sang medical supplies magluwas pa ini sa paghatag sa ulihi sang bag-o nga trabaho kag bag-o nga lugar nga maistaran.
