Ginkumpirma sang Department of Education (DepEd) Capiz nga biktima sang bullying ang 16 anyos nga estudyante nga involved sa insidente sa Jamindan National High School.
Ang estudyante amo si alyas Ben, Grade 9.
Sa interview sang Bombo Radyo kay Ms. Glenda Marie Botin, Division Disaster Risk Reduction and Management Officer sang DepEd-Capiz, iya ginpahayag nga sang recess time, ginpalapitan ni alyas Mario, 16 anyos kag alyas Juan, 15 anyos lunsay Grade 10 students si alyas Ben kag ginsumbag.
Ginaalegar nga may yara sang pilas sa ibabaw sang kilay si alyas Ben.
Gilayon natabo ang paglinagsanay sang tatlo kag may nagdugang nga isa ka estudyante nga amo si alyas Jan-Jan, 14 anyos, Grade 8.
Suno kay Botin, posible nga may yara na sang daan nga indi paghangpanay ang mga involved nga estudyante.
Pahayag niya, ang biktima amo ang nakuhaan sang gwardya sang kutsilyo para sa ‘self-defense’ kuntani niya.
Bangud sa natabo, nagtuga ini sang mass hysteria ukon pagkalipong sang masobra 20 ka mga estudyante nga subong yara na sa mayo nga kahimtangan.
