ROXAS CITY – Pormal na ginpasakaan sang kaso sang mag-asawa nga pulis ang menor de edad nga ginaalegar nagmolestya sa ila 7 ka tuig nga bata nga lalaki.
Nag-atubangay ang magtimbang nga bahin kahapon nga adlaw sang Lunes, Setyembre 20 kag diri nakumpirmar nga mapasaka sang kaso ang mag-asawa.
Samtang sa bahin naman sang pamilya sang 16-anyos nga lalaki nga ginapahayag ginkastigo sang mag-asawa nga pulis, nagahimo naman sang tikang agud maangkon ang hustisya para sa ila bata.
Matandaan nagpalab-ot sang reklamo ang iloy sang 16-anyos matapos nagsugid ini sa iya nga ginkastigo siya kag ginpasibangdan nga nagmolestya sa bata sang mga pulis sang Setyembre 14.
Suno sa iloy nga nag-aku ang iya bata sa iya nga ginmolestya niya gidman ang 7-anyos nga lalaki apang wala nagapati ang iloy bangud suno sa iya tuga lang ini sang kahadlok.
Ginapahayag naman nga sa bahin sang mag-asawa nga pulis nagsugid ang ila bata nga ginmolestya siya sang 16-anyos nga lalaki rason man nga ila ginkaakig.
Mahibaluan yara man ang presensya sang hepe sang Roxas City PNP nga si PLt.Col. Aron Palomo sa pag-atubangay sang magtimbang nga bahin.
