ROXAS CITY – Nag-abot na sa probinsiya sang Capiz ang kapin 162 ka mga repatriated Overseas Filipino Workers (OFW’s) kag locally stranded individuals (LSI’s) gikan sa Metro Manila.
Ang nasambit nga mga indibidwal ang sakay sa una nga batch sang sweeper flight nga ginpatigayon sang gobyerno-probinsiyal sang Capiz nga naghugpa sa Roxas City airport.
Mahibaluan nga mismo si Capiz governor Esteban Evan ‘Nonoy’ Contreras ang nagpanikasog nga mapapauli ang nasambit nga mga indibidwal.
Suno sa gobernador nga mismo gobyerno-probinsiyal ang naghikot sang rapid test, travel authority kag plane ticket sang nasambit nga mga indibidwal.
Nakabaton man sang tag-P2, 000 ang nagpalauli nga mga repatriates kag LSI’s. Ang nasambit nga mga OFW’s ang ginpangsugat sang mga katapo sang magkatuhay nga mga Municipal Disaster Risk Reduction and Management Office (MDRRMO) sa mga kabanwahanan kag igadul-ong sa designated quarantine facility sang ila tagsa ka mga local government unit (LGU’s) para sa quarantine-facility samtang ang iban naman ang igapaidalom sa strict-home quarantine.
