ROXAS CITY, CAPIZ- Nabaton na sang 17 ka mga asosasyon kag kooperatiba sang mga mangunguma sa probinsya sang Capiz ang mga makinarya kag kagamitan sa idalom sang Rice Competitiveness Enhancement Fund (RCEF) Mechanization Program sang Philippine Center for Postharvest Development and Mechanization (PhilMech).
Ginpatigayon ang turn-over ceremony sa pagpanguna ni Governor Fredenil H. Castro, kag iban pa nga mga opisyal sang probinsya.
Sa nangin mensahe ni Capiz Governor Fredenil Castro, iya ginpahayag nga kuntani gamiton kag tatapon sang maayo sang mga benepisyaryo ang amo nga mga pagkabutang agud nga mapasangkad ang palangabuhian sang mga mangunguma kag ila mismo nga pagpangabuhi.
Nahibaluan nga may kabug-osan nga balor nga ₱75 milyon ang mga machineries nga ginakalakipan sang mga masunod:
-10 ka units sang Rice Combine Harvester
-6 ka units sang Four-wheel tractors with attachment
-4 ka unit sang Village Type Rice Mill kag
-2 ka unit sang Precision Rice Seeder
Ang mga benepisyaryo ang nagikan sa mga kabanwahanan sang Dumarao, Dumalag, Cuartero, Jamindan, kag Dao, nga may tag-duha nga benepisyaryo kada asosasyon.
May yara man sang tatlo ka asosasyon ang nagikan sa Mambusao kag Panay, kag isa ka asosasyon man ang nagikan sa banwa sang Tapaz.
Ang nasambit nga inisyatibo ang kabahin sang padayon nga pagsuporta sang gobyerno sa mga mangunguma agud mapasangkad ang ila nga produksyon sa probinsya.
