IVISAN, CAPIZ- Nagpanagtag ang lokal nga gobyerno sang 17 ka motorsiklo sa 15 ka barangay sa banwa sang Ivisan, nga magamit para sa mga importante nga lakat kag transporasyon sa ila mga opisyal.
Suno sa mga barangay captains kag sa Liga Ivisan, nag-request sila kay Mayor Epe agud mapahamtang ini nga mga motorsiklo nga magamit sa mga aktibidad sa barangay, partikular sa mga layo nga lugar.
Sa interview sang Bombo Radyo kay Hon. Nico Yap, Provincial Liga President kag former Officio Board Member, ginpahayag niya nga indi pwede magamit ang mga motorsiklo para sa personal nga lakat sang mga barangay officials. Gamiton lamang ini sa mga opisyal nga katungdanan, pareho sa pagserbisyo sa komunidad kag pag-aplikar sang mga programa sang lokal nga gobyerno.
Dugang pa niya, ang mga motorsiklo magahatag sang mas paspas kag episyente nga pagbiyahe, labi na gid sa mga coastal barangay nga malayo sa banwa.
Ang mga motorsiklo nagahatag man sang dako nga kahigayunan para mapadasig ang mga serbisyo sa mga barangay, kag magamit ini para sa ikasarang kag ikalambo sang banwa.
Sa katapusan, Nagpasalamat man si Yap sa ila Municipal Mayor, Vice Mayor kag Sangguniang bayan bangud suno sa iya kun indi tungod sa mga official indi ini mapatigayon nga makahatag serbisyo kag makahatag kahigayunan sa tanan nga baranggay kag magamit sa ikaayo kag ika-umwad sa ila nga banwa.
Interviewed by Bombo Sunnie Mae Batencila
