IVISAN, CAPIZ – Ginareklamo sang 19 anyos nga babaye ang mga katapu sang Women and Children Protection’s Desk ukon WCPD Section sang Ivisan Municipal Police Station matapos nga ginhilway sa karsel ang iya live-in partner nga nagkuga kag nagbusal sa iya bibig sa banwa sang Ivisan.
Suno sa panaysayon ni Alyas Nene nga gindumog ini sang iya live-in partner sa isa ka event sa ginatrabahuan nila nga resort sa amo nga banwa.
Gindugang pa sini nga ginkuga siya sa liog kag ginbusalan sang lapat sa iya bibig agud indi makasiyagit.
Gilayon nga ginreport sang biktima sa Ivisan PNP ang natabo kag nagpangabay nga presuhon ang iya live partner bangud yara pa ini sa idalom sang impluwensya sang makahulubog nga ilimnon.
Apang tuman nga nadismaya si Alyas nene sang nahibaluan sini kay Police Corporal Dayna Allanic nga ginpaguha ang iya live-in partner.
