ROXAS CITY -Nagapabilin nga naka lockdown ang talatapan sang Bureau of Fire Protection (BFP) Region 6 kasunod sang pagpositibo sang isa ka personnel sini sa Covid-19 Disease.
Ini ang ginkompirmar ni Fire Senior Inspector Stephen Jardeleza, Spokesperson sang BFP Region 6 sang mainterview sang Bombo Radyo.
Suno kay Jardeleza nga may yara sang 32 ka mga personnel sang BFP Region 6 ang wala na ginpasugtan nga makaguwa sa talatapan humalin sang Hunyo 15 tubtob Hunyo 18, 2020 sandig sa ginpaguwa nga mandu ni Iloilo City Mayor Jerry Treñas.
Gindugang pa ni Jardeleza may kapin sa 196 ka mga indibidwal kalakip ang mga personnel sang BFP ang ginpaidalum sa facility quarantine matapos nga naka close contact ang nagpositibo sa Covid-19.
Kalakip diri suno kay Jardeleza nga naka quarantine ang isa ka Capizeño BFP Personnel.
Samtang ginkompirmar man ni Jardeleza nga asymptomatic ang nag-positibo nga BFP Personnel kag nagapabilin nga naka quarantine facility.
Sa karun ginahulat na lamang sang 196 ka indibidwal ang resulta sang ila RT-PCR Test.
